ኢንስቲትዩቱ በሰባት ትምህርት ፕሮግራሞች የሥርዓተ ትምህርት ክለሳ አውደ ጥናት አካሄደ

===================================================

ነሐሴ 20/2018 ዓ.ም | ባሕር ዳር

በባሕር ዳር ዩኒቨርሲቲ የኢትዮጵያ ቴክስታይልና ፋሽን ቴክኖሎጂ ኢንስቲትዩት (EiTEX) በሰባት የትምህርት ፕሮግራሞች የተዘጋጁ የሥርዓተ ትምህርት ክለሳዎችን ለማረጋገጥ የሚያስችል አውደ ጥናት አካሄደ።

አውደ ጥናቱ የኢንስቲትዩቱ አመራሮች፣ መምህራን፣ የኢንዱስትሪ ባለድርሻ አካላት፣ ከተለያዩ የከፍተኛ ትምህርት ተቋማት የተጋበዙ ምሁራን እና ሌሎች እንግዶች በተገኙበት በውጤት ላይ የተመሠረተ ትምህርት (Outcome-Based Education – OBE) መርህን መሠረት በማድረግ ተካሂዷል።

አውደ ጥናቱን በንግግር ያስጀመሩት የኢንስቲትዩቱ የአካዳሚክ ጉዳዮች ምክትል ሳይንቲፊክ ዳይሬክተር ተባባሪ ፕሮፌሰር አዳነ ኃይሌ፣ የሥርዓተ ትምህርት ክለሳው ዋና ዓላማ የኢንስቲትዩቱ የትምህርት ፕሮግራሞች ከዘመኑ የቴክኖሎጂና የኢንዱስትሪ ፍላጎት ጋር የተጣጣሙ፣ ፈጠራን የሚያበረታቱ እና ተማሪዎችን ለሥራ ዓለም የሚያዘጋጁ እንዲሆኑ ማድረግ መሆኑን ገልጸዋል።

ተባባሪ ፕሮፌሰር አዳነ አክለውም፣ ኢንስቲትዩቱ በቴክስታይል፣ በአፓራል፣ በቆዳ፣ በፋሽን እና በተያያዥ የቴክኖሎጂ ዘርፎች የተካኑ ባለሙያዎችን በማፍራት ያካበተውን ልምድ በመጠቀም ለሀገራዊ የኢንዱስትሪ ልማት የሚያበረክቱ ብቁ የሰው ኃይል ለማፍራት በትኩረት እየሠራ መሆኑን ጠቁመዋል።

በአውደ ጥናቱ የቀረቡት ሰባት የትምህርት ፕሮግራሞችም፦

• Textile Engineering 

• Fashion Engineering 

• Leather Engineering 

• Textile Design 

• Fashion Design 

• Textile and Apparel Merchandising 

• Visual Arts

እያንዳንዱ የትምህርት ፕሮግራም አቅራቢ የክለሳውን ይዘት፣ የፕሮግራሙን የመማር–ማስተማር ውጤቶች፣ የተማሪዎች ብቃት እና ከኢንዱስትሪ ፍላጎት ጋር ያለውን ተጣጣም በተመለከተ ገለጻ አቅርበዋል። በመቀጠልም በቀረቡት ሰነዶች ላይ የተሳታፊዎች ጥያቄዎች፣ ምክረ ሀሳቦች እና የሙያ ግብአቶች ተሰጥተዋል።

በአውደ ጥናቱ ከአዲስ አበባ ሳይንስና ቴክኖሎጂ ዩኒቨርሲቲ፣ ከአዲስ አበባ ዩኒቨርሲቲ የሥነ ጥበብና ዲዛይን ትምህርት ቤት፣ በኦንላይን ከተጋበዙ ምሁራን፣ ከኢንዱስትሪ ተወካዮች እና ከኢንስቲትዩቱ ምሁራን የተለያዩ ጠቃሚ ምክረ ሀሳቦችና ግብአቶች ተሰብስበዋል።

የተሳታፊዎች አስተያየትና የባለሙያዎች ግብአት በመጠቀም የሥርዓተ ትምህርቶቹን ጥራት፣ ተገቢነትና የኢንዱስትሪ ተኮርነት ይበልጥ ለማሻሻል እንደሚያግዝ ተገልጿል።

በመጨረሻም የሰባቱ የትምህርት ፕሮግራሞች የሥርዓተ ትምህርት ክለሳ አውደ ጥናት የተለያዩ ባለድርሻ አካላትን በማሳተፍ፣ ሰፊ የሙያ ግብአቶችን በማሰባሰብ እና ተጨባጭ ምክረ ሀሳቦችን በመቀበል በስኬት ተጠናቋል። ክለሳው በቀጣይ በተማሪዎች የተግባር ብቃት፣ በኢንዱስትሪ ትስስር እና በአገራዊ የቴክስታይል፣ ፋሽንና ቆዳ ኢንዱስትሪ ልማት ላይ የሚኖረውን አስተዋጽኦ ለማጠናከር የሚያግዝ ነው።