Latest News

የዩኒቨርሲቲው የቀድሞ ምሩቃን ንግግር (Public Speech) አደረጉ

የባሕር ዳር ዩኒቨርሲቲ ቴክኖሎጂ ኢንስቲትዩት ሳይንቲፊክ ዳይሬክተር ዶ/ር ሰይፉ አድማሱ ለእንግዶችና ለተሳታፊዎች የእንኳን ደህና መጣችሁ መልዕክታቸውን አስተላልፈው የቀድሞ የተቋሙ ምሩቅና በአገሪቱ ብሉም በውጭ አገራት ከፍተኛ አስተዋፅኦ ያበረከቱ ምሁራን ለንግግር ወደ ተቋማቸው በመምጣታቸው አመስግነዋል፡፡

ዶ/ር ሰይፉ አክለውም ዩኒቨርሲቲው 60ኛ ዓመቱን ለማክበር በዝግጅት ላይ መሆኑን አውስተው ይህ ፕሮግራም ለ60ኛ ዓመቱ ዋዜማ ማድመቂያ እንደሚሆንና የቀድሙ ተማሪዎች ስብጥር በርካታ ተግባራትን በማከናወን ጉልህ ፋይዳ እንዳላቸው ተናግረዋል፡፡

መርሃ-ግብሩን በንግግር የከፈቱት የዩኒቨርሲቲው ፕሬዘዳንት ዶ/ር ፍሬው ተገኘ ተመራቂ ተማሪዎች በተመረቁበት ተቋም እንደሚኮሩ ሁሉ ዩኒቨርሲቲውም እንደነዚህ ታዋቂና አንጋፋ ሙሁራን ማፍራቱ ታላቅ ደስታ እንደሚሰማው ገልፀዋል፡፡

ፕሬዘዳንቱ በማስከተል ባሕር ዳር ዩኒቨርሲቲ በማንኛውም መስፈርት በአገሪቱ ካሉ ዩኒቨርሲቲዎች ከአዲስ አበባበ ዩኒቨርሲቲ ቀጥሎ በሁለተኛ ደረጃ እንደሚገኝና ከአፍሪካ ደግሞ 100 ምርጥ ዩኒቨርሲቲዎች ዝርዝር ውስጥ መካተቱን አስገንዝበዋል፡፡

በተጨማሪም ዩኒቨርሲቲው አሁን ላይ በበርካታ ግቢዎች ዘርፈ ብዙ ተግባራትን እያከናወነ መሆኑን በሰፊው አስተዋውቀው የቀድሞ  ተማሪዎች ቡድን መቋቋሙ ለዩኒቨርሲቲውም ሆነ ለከተማው ልማት ፈር ቀዳጅ መሆኑን ፕሮዘዳንቱ ተናግረዋል፡፡

ፕሬዘዳንቱ አክለውም ዩኒቨርሲቲው የከተማውን ውበት ለማስጠበቅ ማስተር ፕላኑን ሲሰራ የካበተ ልምድ ያላቸውና በዛሬው ዕለት ንግግር የሚያቀርቡት ኢንጅነር ግርማ አላሮ የእንበሳውን ድርሻ መውሰዳቸውን አውስተው 60ኛ ዓመቱን ስናከብር የቀድሞ ምሩቃንን ከማሰባሰብ ጎን ለጎን የነበረውን ለመግለፅ ብቻ ሳይሆን ለወደፊት የትኩረት አቅጣጫም ለመለየት ታልሞ መሆኑን ተናግረዋል፡፡

ከቀረቡት የንግግር ርዕሶች ውስጥ፡-

Ø  ኢንጅነር ግርማ አላሮ በ1962 ዓ.ም የቀድሞ ስሙ ፖሊ ቴክኒክ የተመረቁ ሢሆን "International Building Code and How to Build 21 Century Cities" በተሰኘ ርዕሰ ጉዳይ ላይ ሰፊ ንግግር አቅርበዋል፡፡

Ø ኢንጅነር ግዛቸው ሽፈረው በ1963ዓ.ም በፖሊ ቴክኒክ የተመረቁና "Technology Transfer/ Acquisition for Sustainable Development of Ethiopia" በተሰኘ ርዕሰ ጉዳይ ላይ ያቀረቡ ሲሆን የቴክኖሎጂ ሽግግር ከቃል በዘለለ በአገራችን ላይ ተግባራዊ ያደረገው የኢትዮጲያ አየር መንገድ ነው ብለዋል፡፡

Ø አቶ ብርሃን መዋ በ1963 ዓ.ም ከዚሁ ተቋም የተመረቁ ሲሆን " Education and Knowledge, An Entrepreneur’s Experience" በሚል ርዕሰ ጉዳይ ላይ ሲያቀርቡ ትምህርት እውቀትን የማግኘት ሂደት ሲሆን የተማረ ሁሉ ያውቃል፣ ያልተማረ ሁሉ አያውቅም ማለት እንዳልሆነ በሰፊው አውስተዋል፡፡

መድረኩን የመሩት በተመሳሳይ  ግዚያት የተመረቁና ታዋቂው ኢንጅነር ሸዋአፈራው ግርማ ናቸው፡፡

በመጨረሻም የዩኒቨርሲቲው ኢንፎርሜሽንና ስትራቴጅክ ኮሙኒኬሽን ም/ፕሬዘዳንት ዶ/ር ዘውዱ እምሩ ላቅራቢዎች ላቅ ያለ ምስጋና አቅርበው ዩኒቨርሲቲውን የሚያስተዋውቅ ስጦታ ለአራቱም እንግዶች አበርክተዋል፡፡

በሙሉጎጃም አንዱዓለም

የባሕርዳር ዩኒቨርሲቲ የቀድሞ ተማሪዎች በዩኒቨርሲቲው ተገኝተው "ህዝባዊ ዲስኩር እያቀረቡ ነው

በባሕር ዳር ቴክኖሎጂ ተቋም ትምህርታቸውን በ1960ዎቹ አጠናቀው በተለያዩ የአለማችን ክፍሎች በስራ ላይ የሚገኙ ስኬታማ የቀድሞ የዩኒቨርስቲው ተማሪዎች እውቀትን በተቋደሱበት ተቋም በመገኘት ለዩኒቨርሲቲው ማህበረሰብ ህዝባዊ ዲስኩር በማቅረብ ላይ ናቸው።

የዩኒቨርሲቲውን ፕሬዚደንት ዶ/ር ፍሬው ተገኘን ጨምሮ ከፍተኛ አመራሮች እና መምህራን መድረኩን በመታደም ላይ ናቸው።

በባሕር ዳር ዩኒቨርሲቲ የኢትዮጵያ ቴክስታይልና ፋሽን ቴክኖሎጂ ተቋም ዘመናዊ ቤተ መጽሐፍት ተመረቀ።

በባሕር ዳር   ዩኒቨርሲቲ  የኢትዮጵያ  ቴክስታይልና  ፋሽን ቴክኖሎጂ ተቋም ያስገነባውን በርካታ አገልግሎቶችን መሰጠት የሚችል የቤተ መጽሐፍት ሕንጻ አስመርቋል።

በባሕር ዳር ዩኒቨርሲቲ  የኢትዮጵያ  ቴክስታይልና  ፋሽን  ቴክኖሎጂ  ተቋም  ሳይንቲፊክ  ዳይሬክተር ዶ/ር ታምራት ተስፋዬ በመክፈቻ ንግግራቸው ዩኒቨርስቲው በ1956 ዓ.ም ፖሊ ቴክኒክ በሚል ስያሜ ተመስርቶ አገልግሎት መስጠት ከጀመረበት ጀምሮ በመማር ማስተማር፣ በምርምርና በማህበረሰብ አገልግሎት ስራዎችን በመስራት ለሀገር እድገት የሚጠበቅበትን እየሰራ ይገኛል ብለዋል፡፡ እንደ ዳይሬክተሩ ዛሬ የምናስመርቀው ቤተ መጽሐፍት የማህበረሰብ ቤተ-መጽሐፍት (Community Library፣  የህጻናት ቤተ-መጽሐፍት፣ ሰፊ ቦታ ያለው ሰገነት፣ አረንጓዴ ቤተ-መጽሐፍት (Green Garden Library)፣ የድህረ ምረቃ እና ሴቶች  ቤተ መጽሐፍት፣  የምርምር ክፍል፣ የቡድን  ጥናት  ክፍል፣ የሰገነት ማንበቢያ፣ ቢሮዎች፣ ምግብ ቤትና ካፍቴሪያዎች ማሟላቱን ጠቁመዋል፡፡ ቤተ መፅሀፍቱ የአካባቢውን  ማህበረሰብ ተጠቃሚ ለማድረግአገልግሎት እንደሚሰጥ ገልጸዋል፡፡

ባሕር ዳር ዩኒቨርስቲ ፐሬዚዳንት ዶ/ር ፍሬው ተገኘ በስነ-ስርአቱ ላይ በመገኘት እንደተናገሩት ዩኒቨርሲቲው የመጀመሪያ ትውልድ ዩነቨርሲቲ ይሁን እንጂ የመሰረቱት ፖሊ እና ፔዳ የሚያስፈልጋቸውን ሳያሟሉ ለአመታት እንደቆዩ አውስተዋል፡፡ ዛሬ ላይ ግን በልዩ ትኩረት ሲሰራበት የቆየው ቤተ መጽሐፍት የባሕር ዳር ዩኒቨርሲቲ ሥራ  አመራር  ቦርድ  ሰብሳቢ  አምባሳደር ኢንጅነር ስለሺ በቀለ በተገኙበት መመረቁን እንዲሁም የባሕር ዳር ዩኒቨርሲቲ 60ኛ ዓመት የወርቅ እዮቤልዩ በድምቀት ለማክበር የተለያዩ ኮሚቲዎች ተቋቁመው በርካታ ስራዎች 

እየተከናወነ መሆኑን ፕሬዚዳንቱ ጠቁመዋል።

የእለቱ የክብር እንግዳ ክቡር አምባሳደር ኢንጂነር ዶ/ር ስለሽ በቀለ በበኩላቸው መምህራን በክፈል ውስጥ ሰፊ ገለፃ በማድረግ እውቀት ቢያስተላልፉም፤ ስራቸው ውጤታማ እንዲሆን ተማሪዎች ዕውቀታቸውን የበለጠ ለማጎልበት እንደዚህ ያሉ ቤተ መፅሐፍት ያስፈልጉናል ሲሉ ገልፀዋል፡፡ አሁን ላይ እየገጠመን ያለውን የለብ ለብ ንባብ ሶሻል ሚዲያ እና ኢንተርኔት ጥገኛ የመሆን አዝማሚያ እና ከንባበ የራቀውን ወጣት ወደ ንባብ እንዲመለስ ለማድረግ ቤተ መጽሐፍት የጎላ አስተዋፆ አላቸው ብለዋል፡፡  

በምረቃ ሥነ-ስርዓቱ ላይ የባሕር ዳር ዩኒቨርሲቲ ሥራ አመራር ቦርድ ሰብሳቢ አምባሳደር ዶ/ር ኢንጂነር ስለሺ በቀለ ፣ የዩኒቨርሲቲ አመራሮች  እና ሌሎች ጥሪ  የተደረገላቸው  እንግዶች  ተገኝተዋል።

በመጨረሻም የባሕር ዳር ዩኒቨርሲቲ ሥራ አመራር ቦርድ አባላት እና የዩኒቨርሲቲ አመራሮች የሕክምና እና ጤና ሳይንስ ኮሌጅ /ጥበበ ግዮን ስፔሻላይዝድ ሆስፒታል ያሰገነባቸውን ኦክስጅን ማምረቻ፣ ዘመናዊ የደረቅ ቆሻሻ ማስወገጃ፣ የተጣራ ውሃ ማምረቻ እንዲሁም በቅርቡ የሚጀምሩ የህክምና መሳሪያዎችን ጎብኝተዋል፡፡ 

የባሕር ዳር ዩኒቨርሲቲ ዘንዘልማ ግቢ የህጻናት ማቆያ ማዕከል ተመርቆ ስራ ጀመረ

*******************************************************************************

በባሕር ዳር ዩኒቨርሲቲ የግብርናና አካባቢ ሳይንስ ኮሌጅ ለሴት የአስተዳደር ሰራተኞችና መምህራን እፎይታ የሚሰጥ የህጻናት ማቆያ ለመጀመሪያ ጊዜ ስራ ሲጀምር በዩኒቨርሲቲው ውስጥ ተቀጥረው በማገልገል ላይ የሚገኙ 67 ህጻናትን መቀበሉ በምረቃው ላይ ተገልጿል፡፡

የፕሮግራሙን መጀመር ያበሰሩት የኮሌጁ የስነ-ምድር ት/ቤት ዳይሬክተር ዶ/ር ምንያህል ተፈሪ ለሴት የአስተዳደር ሰራተኞችና መምህራን በፆታቸው ምክኒያት ከስራ ገበታቸው ወደኋላ እንዳይቀሩና ሙሉ አቅማቸውን ተጠቅመው ውጤታማ ስራ እንዲያስመዘግቡ የህፃናት ማቆያው መከፈት ጉልህ አስተዋጾ እንደሚኖረው ተናግረዋል፡፡

የማቆያ ማዕከሉን ለማስጀመር በርካታ ውጣ ውረዶች እንደነበሩ ገልፀው ለመወያያ የመነሻ ፅሁፍ ያቀረቡት የኮሌጁ ማኔጂንግ ዳይሬክተር አቶ ታደሰ መኳንንት በዩኒቨርሲቲው ካሉት ግቢዎች መካከል በሶስቱ ግቢዎች ማለትም በፔዳ፣ፖሊና ሰላም ካምፓሶች የህፃናት ማቆያ የተከፈተ ቢሆንም በመልማት ላይ ካሉት ግቢዎች መካከል የዘንዘልማ ግቢ የመጀመሪያው ግቢ ሊባል እንደሚችል ተናግረዋል፡፡

የፆታ እኩልነትን እውን ለማድረግና የእናቶችን የስራ ጫና ለመቀነስ ታልሞ ማዕከሉ እንደተከፈተ እና በአሁኑ ወቅትም 6 ሞግዚቶችና 2 የፅዳት ሰራተኞች በድምሩ 8 ሰራተኞችን በመቅጠር የ67 እናቶችን ህፃናት በመቀበል ስራ መጀመሩን ከቀረበው ፅሁፍ ለመረዳት ተችሏል፡፡

በፕሮግራሙ ላይ ማእከሉ እንዲከፈት ጉልህ አስተዋፅኦ ላበረከቱት የኮሌጁ የሴቶች፣ህፃናትና ወጣቶች ባለሙያ ወ/ሮ ገነት ከበደ የምስክር ወረቀት ተበርክቶላቸዋል፡፡

ለሴቶች ምቹ የስራ ሁኔታ ፈጥሮ ሙሉ አቅማቸውን መጠቀምና ወደ አመራር እንዲመጡ ማብቃት ለሴቷ ብቻ ሳይሆን ለተቋሙ ብሎም ለሀገር እድገት ያለው ፋይዳ የጎላ መሆኑን የውይይቱ ተሳታፊዎች ተናግረዋል፡፡

የዩኒቨርሲቲው አስተዳደር ጉዳዩች ም/ፕሬዚዳንት አቶ ብርሃኑ ገድፍ የመርኃ-ግብሩን ማጠቃለያ ንግግር ሲያደርጉ ከአሁን በፊት በነበሩት አመራሮች ማቆያው ሊከፈት ታስቦ እንደነበረና በተለያዩ ምክንያቶች መዘግየቱን አውስተው አሁን ላይ ስራ መጀመሩ ይበል የሚያሰኝ ተግባር መሆኑን ገልፀዋል፡፡

አቶ ብርሃኑ ገድፍ አክለውም ከሰራተኛው የተነሱት አንዳንድ ጥያቄዎች በሂደት እየታዩ መልስ የሚያገኙ እንደሆኑና ዩኒቨርሲቲው ክትትልና ድጋፉን አጠናክሮ እንደሚቀጥል ተናረዋል፡፡ አክለውም  ይህ አይነት  ምቹ የስራ ሁኔታ ሲፈጠር ሁሉም ሰራተኛ በስራ ሰዓት የስራ ገበታው ላይ በመገኘት የተሰጠውን ተግባር በብቃት መወጣት እና የበኩሉን አስተዋጽኦ ማበርከት እንዳለበት አሳስበዋል፡፡

በሙሉጎጃም አንዱዓለም