ዝቅተኛ ገቢ ላላቸው ሴቶች የልብስ ዲዛይን እና ስፌት  ስልጠና እየተሰጠ ነው

በባሕር ዳር ዩኒቨርሲቲ የኢትዮጵያ ቴክስታይል እና ፋሽን ቴክኖሎጂ ኢንስቲትዩት በአፓራል ፋካሊቲ ከአማራ ብሔራዊ ክልላዊ መንግስት ጤና ቢሮ እና ከህብረተሰብ ጤና ኢንስቲትዩት የሴቶች ህፃናት እና ማህበራዊ ጉዳዮች ቢሮ ለመጡ ዝቅተኛ ደመወዝ ተከፋይ 20 ሴት ሠራተኞች ለሦስት ወራት የሚቆይ የልብስ ዲዛይን እና ስፌት ስልጠና እየተሰጠ ነው፡፡ 

ይህ ስልጠና በዝቅተኛ ገቢ ለሚተዳደሩ ሴት ሠራተኞች የግል ሥራቸውን በመፍጠር ተጨማሪ ገቢ እንዲገኙ የሚያግዝ እንደሆነ የስልጠናው የአፓሬል ፋኩሊቲ ፋሲሊቲ ማናጀርና የስልጠናው አስተባባሪ አቶ ንጉሴ መኳንንት ገልጸዋል፡፡ 

ይህ ስልጠና ለሦስተኛ ዙር እየተሰጠ ሲሆን ስልጠናውም በሳምንት ሦስት ቀን፣ በቀን ለ4 ሰዓት የሚሰጥ ተግባር ተኮር ስልጣና ሆኖ ለመግቢያ የሚሆን ንድፈ ሀሳብ እንደሚሰጥ ተገልጿል።

ከዚህ በፊት የተለያዩ  አጫጭር ስልጠናዎችን በማህበረሰብ አገልግሎት ሲሰጥ የቆየ ቢሆንም አሁን  ማንኛውም  ፍላጎት ያለው አካል በተመጣጣኝ ክፍያ ስልጠናውን በመውሰድ የተጨማሪ ሙያ ባለቤት መሆን እንደሚችልና የግል ገቢንም ማሳደግ የሚያስችል ስልጣና መሆኑን የአፓሬል ፋኩሊቲ ፋሲሊቲ ማኔጀርና አሰልጣኝ አቶ ንጉሴ መኳንንት ገልጸዋል።