ለአብያተ መጽሀፍት ሰራተኞች ስልጠና

ለአብያተ መጽሀፍት ዳይሬክቶሬት ሰራተኞች ስልጠና ተሰጠ

የባሕር ዳር ዩኒቨርሲቲ የስልጠና ዳይሬክቶሬት ከዩኒቨርሲቲው አብያተ መጽሀፍት ዳይሬክቶሬት ጋር በመተባበር ከጥቅምት 21 እስከ 24/2015 ዓ/ም ድረስ በሁለት ተከታታይ ዙር ለአብያተ መጽሀፍት ባለሙያዎች ስልጠና ሰጥቷል፡፡

የባሕር ዳር ዩኒቨርሲቲ አብያተ መጽሀፍት ዳይሬክቶሬት ዳይሬክተር አቶ እሱባለው ሰንደቄ የስልጠናውን አስፈላጊነት ሲናገሩ በመጽሀፍት ውሰት ጊዜ ስራን ለማቀላጠፍ፣ መረጃዎችን ለማጠናከር ብሎም የሚዛባውን መረጃ ለማስተካከል ይጠቅማል ብለዋል፡፡

አቶ እሱባለው አክለውም ስልጠናው ካሁን በፊትም በሶስቱ የአብያተ መጽሀፍት ያሰራር ዘዴዎች አውቶሜሽን ስርዓት፣ ዲጅታል ቤተ-መጽሀፍት፣ ተቋማዊ ሪኩዚት ዙሪያ ለእያንዳንዱ ሰራተኛ ሙያዊ ስልጠና በመሰጠቱ ስራው ከ90% በላይ በሲስተም እየተከናወነ እንደሚገኝ ተናግረዋል፡፡

ስልጠናውን ሲሰጡ ያገኘናቸው በባሕር ዳር ዩኒቨርሲቲ አይ ሲ ቲ ዳይሬክቶሬት ስር የመማር ማስተማር ቡድን መሪ አቶ ፈንታሁን መኩሪያው በበኩላቸው ይህ ስልጠና የተዘጋጀው በላይብረሪ ውስጥ ካሉት የስራ ክፍሎች መጽሀፍት ለሚያውሱ ባለሙያዎች መጽሀፍትን ለተጠቃሚዎች ማዋስ የሚያስችላቸውን ሲስተም ሲሆን ነገር ግን መብራት በሚጠፋበት ስዓት ተጠቃሚዎች እንዳይጉላሉ እራሳቸው ኮምፒዩተር ላይ መረጃ እያስቀመጡ ኢንተርኔት ሲመጣ መረጃ ኮፒ እያደርጉ መጠቀም የሚያስችል ስልጠና ነው ብለዋል፡፡

አቶ ፈንታሁን መጽሀፍ በሚያውሱበት ጊዜ ከአሁን በፊት በተደጋጋሚ የሚጠይቋቸውን ከአስር በላይችግሮችን ዘርዝረን በማውጣት እነዚህ ችግሮች ሲያጋጥሟቸው ወደ እኛ ሳይመጡ እራሳቸው እንዴት መፍታት እንደሚችሉ ግንዛቤ ማስጨበጫ ስልጠና መስጠት ተችሏል፡፡ አጠቃላይ በዩኒቨርሲቲው አይ ሲ ቲ ዘርፍ በርካታ የሲስተም ስራዎች የተሰሩ ሲሆን በአብያተ መጽሀፍት ክፍልም ሶስት ሲስተሞች ሰርተን አስረክበናል ብለዋል፡፡   

በስልጠናው ማጠቃለያ ንግግር ያደረጉት የባሕር ዳር ዩኒቨርሲቲ የስልጠና ዳይሬክተር አቶ ወርቁ አበበ ስልጠናው ያስፈለገበትን ምክንያት ሲገልፁ ባለሙያው ከዘመኑ ቴክኖሎጅ ጋር እንዲተዋወቅ እና በሙያው ያለውን ክፍተት ለመሙላት እንደሚያስችለው ተናግረዋል፡፡ ከስልጠናው በኋላም አገልግሎቱ እንዴት እየተሰጠ ነው፣ ምን ያህል ውጤታማ ሁነዋል በሚል ጥናት አድርገን አሁንም ክፍተት ከተገኘ ተጨማሪ ስልጠና እንደሚሰጥ ገልፀዋል፡፡