Latest News

ባሕር ዳር ዩኒቨርሲቲ በቀን ከ400 በላይ ለጤና ባለሙያዎች የሚሆን የኮሮና ቫይረስ መከላከያ አልባሳትን ማምረት ጀመረ፡፡ የዚህን ዜና በኢቢሲ እንደተዘገበው የሚከተለውን ሊንክ በመከተል ይከታተሉ፡፡
https://www.facebook.com/watch/?v=1482203401961863

ኮሮና ቫይረስን መከላከል

ጠቃሚ መረጃ!

የህክምናና ጤና ሳይንስ ኮሌጅ የ10 ዓመቱ ስትራቴጅክ ዕቅድ ላይ ውይይት አካሄደ
==============================================
የባሕር ዳር ዩኒቨርሲቲ ሕክምናና ጤና ሳይንስ ኮሌጅ በኮሌጁ የ10 ዓመት ስትራቴጅክ እቅድ ዙሪያ የዩኒቨርሲቲው ከፍተኛ አመራሮች እና መንግስታዊ ከሆኑና መንግስታዊ ካልሆኑ አጋር አካላት የተውጣጡ ባለሙያዎች በተገኙበት ሰፊ ውይይት አካሂዷል፡፡
 
በፕሮግራሙ የባሕር ዳር ዩኒቨርሲቲ ሕክምናና ጤና ሳይንስ ኮሌጅ ኤክስኪዩቲቭ ዳይሬክተር ፕ/ር የሺጌታ ገላው ተገኝተው የእንኳን ደህና መጣችሁ ንግግር ያደረጉ ሲሆን የ10 ዓመ ትመሪ ዕቅዱ የባሕር ዳር ዩኒቨርሲቲን ራዕይና ተልኮ ግምት ውስጥ በማስገባት መቅረቡን አመላክተዋል፡፡ ፕሮፌሰሩ በእቅዱ ዝግጅት ላይ የተሳተፉትን የዝግጅት ቡድን አባላት ለነበራቸው ሙያዊ አስተዋፅኦ ምስጋና አቅርበዋል፡፡
 
የውይይት መድረኩን በንግግር የከፈቱት በባሕር ዳር ዩኒቨርሲቲ አካዳሚክ ጉዳዮች ም/ፕሬዝዳንት የሆኑት ዶ/ር እሰይ ከበደ በበኩላቸው ተቋሙ ገና በቅርቡ የተቋቋመ ቢሆንም እያስመዘገበ ያለው ውጤት ከሀገርም አልፎ በአፍሪካ ደረጃ ተወዳዳሪ እየሆነ ይገኛል ብለዋል፡፡
 
የ10 ዓመት ስትራቴጅክ ዕቅዱ በባሕር ዳር ዩኒቨርስቲ ህክምናና ጤና ሳይንስ ኮሌጅ ሀኪም በሆኑት ዶ/ር ወንድማገኝ እምቢያለ የቀረበ ሲሆን በውይይቱ እንደ ጭብጥ ከተነሱት ርእሶች ውስጥ የሚከተሉት ተካተዋል፡-
1. Excellence in clinical and community service outcome.
2. Excellence in academic quality and relevance.
3. Excellence in Research and Technology Transfer.
4. Excellence in leadership and Governance, and Institutional capacity.
5. Excellence in communication and partnership.
በእለቱም ሁሉም ታዳሚዎች በቡድን ተወያይተው በርካታ ሃሳቦች በእቅዱ እንዲካተቱበት ተደርጓል፡፡

የባሕር ዳር ዩኒቨርሲቲ ተማሪዎች ከባህር ዳር ከተማ ወጣቶች ጋር በጋራ በመሆን አኩሪ ተግባር ፈፀሙ፡፡
*****************************************************************************
በሸጋዉ መስፍን
“ምክንያታዊና ንፁህ ትዉልድ (ም.ን.ት)” የተሰኘዉና በምስረታ ላይ ያለዉ የበጎ ተግባር አራማጅ ተማሪዎች ማህበር በከተማዋ ከሚገኘዉ “ድንበር የለሽ የበጎ አድራጎት ማህበር” ጋር በመተባበር ጥር 13/2012 ዓ.ም ከጠዋቱ 12፡00 ጀምሮ በጥምቀት በዓል ምክንያት መንገድ ላይ የወዳደቁ ቆሻሻዎችን ጨምሮ የባህር ዳር ከተማ መስቀል አደባባይን አፅድተዋል፡፡

የፅዳት ፕሮግራሙን ሲያስተባብር ያገኘነዉ ተማሪ ቀለሙ እሱባለዉ እንደገለፀዉ አሁን አሁን በእምነት ምክንያት ቁርሾ ለመፍጠር የሚሞክሩ አካላት እንዳሉ ጠቅሶ ማህበራቸዉ እነዚህን አካላት በተግባር ይታገላል ብሏል፡፡
በፅዳት ዘመቻዉ ስትሳተፍ ያገኘናት ተማሪ በእምነት አማን የፕሮቴስታንት እምነት ተከታይ መሆኗን ገልፃ ማህበሩ የተለያዩ ብሄርና ሀይማኖቶች ስብጥር ያለበት በመሆኑ አገራዊ አንድነታችንን ለማስቀጠል ትልቅ ፋይዳ አለዉ ስትል እምነቷን አንፀባርቃለች፡፡ተማሪ በእምነት አክላም የዩኒቨርሲቲ ተማሪ በአእምሮው የጎለመሰ ነዉ በማለት ኢትዮጱያዊነት የሚመሰረተዉ ከዚሁ ነዉ ስትል ጨምራ ገልፃለች፡፡

የ3ኛ አመት የኢኮኖሚክስ ተማሪ የሆነዉ የሱፍ አህመድ በበኩሉ ይህ የፅዳት ዘመቻ የአንድነት እሴታችንን ለማዳበር ትልቅ ፋይዳ አለዉ፤ ከክርስቲያን ወንድሞቼ ጋርም በፅዳቱ በመሳተፌ በጣም ደስተኛ ነኝ ብሏል፡፡ተማሪ የሱፍ አክሎም ዘር፣ ቋንቋ፣ ብሄር ሳይል አንድነታችን የተመሰረተዉ ከፖለቲካዉ በፊት ነዉ፤ ስለሆነም ሊለያዩን ቢሞክሩም አይሳካላቸዉም ሲል ተናግሯል፡፡

ከባህር ዳር ከተማ “ድንበር የለሽ የበጎ አድራጎት ማህበር” ያነጋገርነዉ የማህበሩ ፕሬዝዳንት ደራሲና ተዋናይ ከፊያለዉ እሸቴ ማህበራቸዉ በጎ እናስብ (think positive) በሚል መሪ ቃል የተቋቋመ መሆኑን ጠቅሶ ማህበራቸዉ ሰባት አላማዎችን ለመፈፀም እንደሚሰራ ተናግሯል፡፡በዚህም የፅዳት ዘመቻን ጨምሮ ሱስን መከላከል፣ መተሳሰብን ማጎልበት፣ ንቁ ዜጎችን ማፍራት ከማህበሩ አላማዎች ዋነኞቹ ናቸዉ ብሏል፡፡ ማህበራቸዉም ከባሕር ዳር ዩኒቨርሲቲ ጋር በጋራ ለመስራት ዝግጁ መሆኑን ገልፆልናል፡፡
ሌላዋ በፅዳት ዘመቻዉ ስትሳተፍ ያገኘናት የ1ኛ አመት የማህበራዊ ሳይንስ ተማሪ እና የእስልምና እምነት ተከታይ የሆነችዉ ተማሪ ከሚላ በላቸዉ በዚህ ተግባር በመሳተፏ በጣም እንደተደሰተች ገልፃ ቆሻሻዉ በአጋጣሚ በጥምቀት በአል የተፈጠረ ቢሆንም የከተማዋ ፅዱ መሆን ለሁሉም ነዋሪ ወሳኝ በመሆኑ ሁሉም ሰዉ በዚህ ተግባር መሳተፍ አለበት ብላለች፡፡ከሚላ በተጨማሪም ‘ሀምሳ ሎሚ ለሀምሳ ሰዉ ጌጡ ለአንድ ሰዉ ሸክሙ’ እንዲሉ በከተማ የመንገድ ፅዳት ስራ ለተሰማሩ እናቶች ከፍተኛ ድካምን ይቀንሳል ብላለች፡፡

በቦታዉ ተገኝተዉ ለወጣቶች ንግግር ያደረጉት የባሕር ዳር ዩኒቨርሲቲ ኢንፎርሜሽንና ስትራቴጂክ ኮሙኒኬሽን ም/ፕሬዝዳንት ዶ/ር ዘዉዱ እምሩ በሌሊት ብርድ ሳይበግራቸዉ የዘንባባ ቅጠሎችን በመያዝ ከተማዋን ለሚያፀዱ ወጣቶች የተሰማቸዉን ልዩ የሆነ ደስታ እና ያሳደረባቸውን ተስፋ ገልፀዋል፡፡ይህ ተግባር በታሪክ ተመዝግቦ ይኖራል፤ መሰል ስራዎች ቢጠናከሩ ክፋት ከአካባቢያችን ይርቃል ሲሉ ወጣቶችን አበረታተዋል፡፡

የፅዳት ዘመቻዉ መስቀል አደባባይን ጨምሮ ከአዘዋ ሆቴል እስከ ሙሉአለም የባህል ማዕከል ያለዉን መንገድ ያካለለ ሲሆን በዚህ ድንቅ ተግባርም ከወጣቶች በተጨማሪ የዩኒቨርሲቲዉ ከፍተኛ የስራ ሀላፊዎች፣ መምህራንና ሰራተኞች ተሳትፈዉበታል፡፡

“ንፁህ ትዉልድ እንፍጠር“ ፣ደማቅ የኪነ ጥበብ ምሽት ተካሄደ

በሸጋዉ መስፍን

በባሕር ዳር ዩኒቨርሲቲ ፔዳ ግቢ አዳራሽ የዩኒቨርሲቲዉ ተማሪዎች፣ አመራሮችና ተጋባዥ እንግዶች በተገኙበት ጥር 9/2012 ዓ.ም ደማቅ የኪነ ጥበብ ምሽት ተካሂዷል፡፡

የኪነ ጥበብ ምሽቱን በንግግር የከፈቱት የዩኒቨርሲቲዉ የዉስጥ ግንኙነት ዳይሬክቶሬት ዳይሬክተር አቶ ታደሰ አክሎግ በተማሪዎች አነሳሽነት እና በባህል ማዕከሉ ተባባሪነት ፕሮግራሙ መዘጋጀቱን አመስግነዉ፤ መሰል ዝግጅቶች በሚኖሩበት ጊዜ የዩኒቨርሲቲው ድጋፍ እንደማይለያቸዉ ጠቁመዋል፡፡አክለዉም የዉጭ ሀገራት ተሞክሮዎችን በመጥቀስ መሰል የኪነ ጥበብ ፕሮግራሞች በተማሪዎች ህይወት ላይ አዎንታዊ ተፅዕኖ ስለሚያሳድሩ መዘዉተር አለባቸዉ ብለዋል፡፡

በፕሮግራሙ ላይ በክብር እንግድነት ተገኝተዉ ለታዳሚዎች አነቃቂ ንግግር ያደረጉት በባሕር ዳር ዩኒቨርሲቲዉ የሳይኮሎጅ መምህር አቶ ታምሩ ደለለኝ እንደተናገሩት የዩኒቨርሲቲ ተማሪዎች  ሁለት ዋነኛ ችግሮችን ሊያስቡባቸው ይገባል ብለዋል፡፡ አንደኛው ስብዕናና ክህሎት በማይገነቡ ጊዜያዊ እርካታ ላይ በሚያተኩሩ ክዋኔዎች ለምሳሌ ቲሸርቶችን እያሳተሙ የከለር ደይ፣ ቤቢ፣ ውሃ ደይ ወይም ሌሎች የመሳሰሉት ላይ ማተኮር ሲሆን፤ ሌላው እና ከቅርብ ጊዜ ወዲህ ትልቅ ችግር እየሆነ የመጣው ደግሞ ሰክኖ ከመወያየት ይልቅ አለመግባባትና ግጭት በስፋት መከሰት ናቸው፡፡ ከአለመግባባት እና ግጭት ጋር በተያያዘም ተማሪዎች በዙሪያቸው ያሉ ሌሎች ተማሪዎችን እንደ ተማሪ  እንዲመለከቷቸውና እርስበእርስ እንዲተሳሰቡ መክረዋል፡፡ አቶ ታምሩ በመቀጠልም ተማሪዎች ትዕግስትና ማስተዋልን አጥብቀዉ በመያዝ የዩኒቨርሲቲ ቆይታቸው ለህይወታቸው የሚያስፈልጋቸውን ተጨማሪ ስንቅ የሚያገኙበት እንዲሆን እንዲያደርጉት አሳስበዋል፡፡  

በኪነ ጥበብ ምሽቱ “የንፁህ ትዉልድ እንፍጠር” በጎ ሀሳብ አፍላቂ ተማሪዎች የተሳተፉበት ሲሆን በቀጣይም መሰል ፕሮግራሞች በየ 3 ሳምንቱ እንደሚካሄዱ የዩኒቨርሲቲዉ የተማሪዎች ባህል ማዕከል ኃላፊ ተማሪ ተመስገን ሙሉቀን ተናግረዋል፡፡ በኪነ ጥበብ ምሽቱ በርካታ ታዳሚያን የተገኙ ሲሆን በፕሮግራሙ መደሰታቸዉን ለመረዳት ተችሏል፡፡

በኪነ ጥበብ ምሽቱ በርካታ የግጥም ስራዎችን ጨምሮ ‘በቃን’ በሚል ርዕስ የተዘጋጀ አዝናኝና አስተማሪ ጭዉዉት አንዲሁም ‘ከኛ ጓዳ’ የተሰኘ ተከታታይ የኮሜድ ስራ ቀርቧል፡፡

የባሕር ዳር ዩኒቨርሲቲ ከቡክስ ፎር አፍሪካ በዕርዳታ የተረከባቸውን መፅሀፎች ለወረዳ ትምህርት ቤቶች አከፋፈለ፡፡

በሙሉጌታዘለቀ

ባሕር ዳር ዩኒቨርሲቲ መቀመጫውን አሜሪካን ሀገር ካደረገው ቡክስ ፎር አፍሪካ ከተሰኘው ግብረ-ሰናይ ድርጅት ጋር ባደረገው ግንኙነት በዕርዳታ ያስመጣቸውን የሳይንስ፣ የሂሳብ፣  የቋንቋ እና ስነ-ፅሁፍ መፅሀፎችን  በይልማናዴንሳ ወረዳ ለሚገኙ ትምህርት ቤቶች አከፋፍሏል፡፡

የዚህ ድጋፍ ተጠቃሚ የሆኑት አዴት ከተማ የሚገኙ ትምህርት ቤቶችና ብርአዳማ አካባቢ ደግሞ በሰከላል ጃንባራ መድሀኒያለም ቀበሌ የሚገኘው ገብረን አንደኛ ደረጃ ትምህርት ቤት፣ በስማርጋ ቀበሌ የሚገኘው ቼመን አንደኛ ደረጃ ትምህርት ቤትና በአይቫር ቀበሌ የሚገኘው መጣቅር አንደኛ ደረጃ ትምህርት ቤቶች ሲሆኑ እርዳታው ለሌሎችንም የመንግስት ት/ቤቶች ያካተተ እንደነበር ታውቋል፡፡ መፅሀፎቹ ለመምህራን እና ለተማሪዎች ማጣቀሻነት የሚሆኑ ከ1ኛ - 4ኛ ክፍል እና ከ5ኛ- 8ኛ ክፍል እንዲሁም ለጎልማሶች ትምህርት የሚያገለግሉ እንደሆኑ ማወቅ ተችሏል፡፡ በእለቱም ከ10 ካርቶን በላይ የሚሆኑ የሳይንስ፣ የሂሳብ፣ የቋንቋ፣ የስነ-ፁሁፍ እና የማህበራዊ ሳይንስ ይዘት ያለቸው መፅሀፎች ለእያንዳንዱ ትምህርት ቤት ቦታው ድረስ በመሄድ ለርዕሳነ መምህራን  ርክክብ ተፈፅሟል፡፡

በርክክቡ ወቅት በሰከላል ጃንባራ መድሀኒያለም ቀበሌ የሚገኘው ገብረን አንደኛ ደረጃ ትምህርት ቤት ርዕሰ መምህር የሆኑት አቶ አዱኛ አጥናፉ እንዳሉት የተደረገላቸው የመፅሀፍ እርዳታ በገንዘብ ሊተመን የማይችልና የተማሪዎችን ብሎም የመምህራንን የዕውቀት ክፍተት ለመሙላት የሚያግዝ ነው ብለዋል፡፡ ይህም የተማሪዎቻቸውን በሀገር ደረጃ የመወዳደር አቅም የሚያጎለብት በመሆኑ የመፅሀፍ እርዳታው ለትምህርት ቤቱ ትልቅ ትርጉም እንዳለው ተናግረዋል፡፡ ዳይሬክተሩ አክለውም በትምህርት ቤታቸው ያሉባቸውን 1ኛ. ለሳይንስ ትምህርቶች የሚያገለግሉ ኬሚካሎች 2ኛ በፀሃይ  የሚሰራ የሃይል ማመንጫ ችግር ለመቅረፍ የባሕር ዳር ዩኒቨርሲቲ የበኩሉን አስተዋፆ እንዲያደረግላቸው ጠይቀዋል፡፡

የባሕር ዳር ዩኒቨርሲቲ የምርምርና ማህበረሰብ አገልግሎት ካደረገው የመፅሀፍ እርዳታ በተጨማሪ በይልማናዴንሳ ወረዳ ውስጥ ለሚገኙ ከስድስት በላይ የችግኝ ጣቢያዎች ግብዓት የሚሆኑ የተለያዩ በሰው የሚገፉ ጋሪዎች፣አካፋዎች፣የመጎንደያ መቀሶች፣ የአሸዋ መንፊያ ወንፊቶችና መጋዞችን ለጣቢያዎቹ አበርክቷል፡፡ የይልማናዴንሳ ወረዳ የስማርጋ ችግኝ ጣቢያ ሰራተኛና የባሕር ዳር ዩኒቨርሲቲ ተወካይ የሆኑት ወ/ሮ ዳሳሽ ላቃቸው እንዳሉት ችግኝ ጣቢያው በአመት ከ80ሺ በላይ የተለያዩ አገር በቀል ችግኞችን በማፍላት ለአካባቢው ማህበረሰብ በነፃ እንደሚያቀርብ ገልፀው እስካሁን ባለው የስራ ሂደት ምንም አይነት የቁሳቁስም ሆነ የግብዓት ችግር እንዳላጋጠማቸው  ተናግረዋል፡፡

የመፅሃፍ ድጋፉ በጎንደር አካባቢ ለሚገኙ የወረዳ የመንግስት ትምህርት ቤቶችም የተደረገ ሲሆን መፅሃፎች ተመሳሳይ ይዘት ያለቸው  መሆኑንም ለማወቅ ተችሏል፡፡

 

 

 

 

 

 

 

 

ባሕር ዳር እንደ ቤቴ የገና በዓልን ከተማሪዎች ጋር አከበረ
**********************************************
ከተመሰረተ አንድ አመትን ባስቆጠረው ባሕር ዳር እንደ ቤቴ በተሰኘው ፕሮጀክት ስም በባህር ዳር ከተማ ምክትል ከንቲባ መኖሪያ ቤት ከ30 በላይ የሚሆኑ የባሕር ዳር ዩኒቨርሲቲ ተማሪዎች በታደሙበት የገና በዓል በደመቀ ሁኔታ ተከበረ፡፡
 
የእንኳን ደህና መጣችሁ ንግግር ያደረጉት የባሕር ዳር ዩኒቨርሲቲ ምክትል ቦርድ ሰብሳቢና የባህር ዳር ከተማ ምክትል ከንቲባ አቶ አማረ አለሙ ሲሆኑ የዕለቱን ዝግጅት ጨምሮ ለከተማው ህብረተሰብ ሰላም እና መረጋጋት ላበረከቱት አስተዋፅኦ የሀገር ሽማግሌዎችንና ወጣቶችን አመስግነዋል፡፡ አቶ አማረ አክለውም የዩኒቨርሲቲ ተማሪዎች በከተማዋ ቆይታቸው ሰላማዊ እንዲሆን የተለያዩ አደረጃጀቶችን በማወያየት የተለያዩ ስራዎች እንደተሰሩ አውሰተው ከፍተኛ አመራሩም የተማሪዎች ችግር ችግሩ የሆነ ስለ ሰላማቸውና የተረጋጋ የትምህርት ድባብ እንዲፈጠር ተግቶ እየሰራ የሚገኝ መኖኑን ገልፀዋል፡፡ የዕለቱን ሁነት ሲገልፁም የባሕር ዳር እንደ ቤቴ ፕሮግራም ፈቃደኛ ተማሪዎችን ወደ ቤት በመውሰድ እንደ ቤታቸው እንዲሰማቸውና እንደ ወላጅ የሚመክር ቤተሰብ እንዲኖራቸው ለማድረግ ከሚደረግው ተግባር ውስጥ አንዱ መሆኑን ጠቁመዋል፡፡
 
የባሕር ዳር ዩኒቨርሲቲ ፕሬዝዳንት ዶ/ር ፍሬው ተገኜ በበኩላቸው ዩኒቨርሲቲው አሁን ባለው ወቅታዊ ጉዳይ አነሰም በዛ በተማሪዎች ላይ ይህ ነው የሚባል ጉዳት ሳይደርስብ ቆይተናል ሲሉ ፈታኙን ጊዜ ገልፀዋል፡፡ እለቱን አስመልክቶም ባሕር ዳር እንደ ቤቴ ፕሮግራም በፈቃደኛ ወላጆችና ወጣቶች ትስሰር 1ኛ ዓመት እንደሞላው ጠቅሰው በእለቱ እንደተደረገው በአንድ ግለሰብ ከ30 በላይ ተማሪዎችን ተቀብሎ እንደቤታቸው ቆጥረው በዓሉን እንዲያሳልፉ ማድረግ መቻሉ አዲስ ምዕራፍ እንደሆነ ተናግረዋል፡፡ በዓሉን ስናከብር ተማሪዎች ከተለያዩ ብሄር ብሄረሰቦች እንደመምጣታቸው ቤተሰብን የሚናፍቅ ተማሪ እና ቤተሰብ ለመመስረት የሚፈልግ ወላጅን ለማገናኘት ምቹ ሁኔታን የሚፈጥር በጎ አጋጣሚ ሲሉ የባህር ዳር እንደ ቤቴ ፕሮግራምን ገልፀውታል፡፡
የባህር ዳር ከተማ የደራሲያ ማህበር ሊቀመንበር ሊቀ ሂሩያን በላይ መኮነን የሀገር ሽማግሌዎችን ወክለው እንደተናገሩት በርካታ ተማሪዎችን በማሰባሰብ በአንድ ላይ በዓል እንድናከብር ያደረጉትን አቶ አማረ አለሙ አመስግነው ባህር ዳርን ከሚያውቁበት ከ1950ዎቹ ጀምሮ በትምህርትም ሆነ በስራ ሰዎች ሲሰባሰቡ በፍቅር ያስተናገደች ከተማ መሆኗን መስክረው ባሕር ዳር እንደ ቤቴ ሳይሆን ከተማዋን ቤቴ እንዲሏት አባታዊ ሀሳባቸውን ለግሰዋል፡፡
 
የዘንድሮውን የባህር ዳር እንደ ቤቴ ፕሮግራም የተለየ በሚያደርግ ሁኔታ በኢትዮጵያ ህክምና ተማሪዎች ማህበር በባህር ዳር ቅርንጫፍ የበጉ አድራጎት የስራ ዘርፍ ከበሕር ዳር ዩኒቨርሲቲ የህክምናና ጤና ሳይንስ ኮሌጅ ፈለገ ጊዮን ስፔሻላይዝድ ሆስፒታል ጋር በመተባበር ታካሚዎችንና አስታማሚዎችን በማሰባሰብ በዓልን እንደቤታቸው እንዲሰማቸው በተለያዩ ዝግጅቶች አክብሮ ውሏል፡፡
 
በመጨረሻም የዩኒቨርሲቲው ተማሪዎችን እንደቤታቸው እንዲሰማቸው የተሸለ እየሰሩ ያሉ አመራሮች በከተማው ወጣቶች ሽልማት ተበርክቶላቸዋል፡፡

Pages