plans

Strategic Plan

The Bahir Dar University Strategic Plan 2008-2012 EC (2015/16-2019/20 G.C)  provides the University community a roadmap for the next five years.  The Strategic Plan is prepared in a time when our Government has initiated a bold and strong five year Growth and Transformation Plan that gave  due consideration to higher education development. We the University community commit ourselves to play our part in the achievement of the Growth and Transformation Plan through this Strategic Plan.

ሀገራችን ኢትዮጵያ መካከለኛ ገቢ ያላት ሀገር ለመሆን በማቀድ መስራት በመጀመሯ በርካታ ተስፋ ሰጭ ውጤቶች እየተመዘገቡ ናቸው፡፡ በኢኮኖሚ፣ በፖለቲካና በማህበራዊ ዘርፎች ሀገሪቱ መጠነ ሰፊ ለውጦችን አምጣለች፡፡ ዕድገቷንም ፈጣን፣ ተከታታይነት ያለውና ሁሉን አቀፍ በሆነ መልኩ እንዲመጣ የሚሰራው ስራ በጣም ሰፊ ነው፡፡ ፈጣን፣ ተከታታይነት ያለውና ፍትሀዊ ልማት የሚመጣው ደግሞ የሰለጠነ የሰው ሀይል መሠረቱ ያደረገና የሳይንስና ቴክኖሎጂ መሠረት ያለው ልማት ሲመጣ ነው፡፡ እንደ ኢትዮጵያ ያሉ ዋነኛ ሀብታቸው ጉልበትና መሬት የሆኑ ሀገሮች በተጨባጭ ዕድገት ያመጡበትን ብልሀት በመቀመር ሀገራችንም ለራሷ አዋጭ ያለችውን መንገድ መርጣ ባለፉት አስር አመታት ያስመዘገበችው ውጤት ተስፋዋን አለምልሟል፡፡ ሀገራችን የግብርና ውጤቶቿን ምርትና ምርታማነት በመጨመር የምትፈጥረው ሀብት ለኢንዱስትሪው መሠረትና ግብዓት በማድረግ የኢንዱስትሪ መሠረት ያለው ኢኮኖሚ ለመገንባት በማለም እየሠራች ነው፡፡

ሀገራችን ያቀደቻቸው ግቦች የሚሳኩት በሰለጠነ የሰው ሀይል ሲመሩና ሲሰሩ መሆኑን በመገንዘብ ለሰው ሀይል ልማት የሰጠችው ትኩረት ከፍተኛ ነው፡፡ በዚህም መሠረት በአንደኛው የዕድገትና ትራንስፎርሜሽን ዘመን በከፍተኛ ትምህርት ግማሽ ሚሊዩን ዜጐች የትምህርት ዕድል እንዲያገኙ አቅዳ በመስራት በርካታ ስኬቶች ተመዝግበዋል፡፡ ለዝርዝር መረጃ የትምህርት ሚኒስቴር የአንደኛውን የዕድገትና ትራንስፎርሜሽን ዘመን አፈፃፀም የገመገመበትን ሰነድ ማየት ይቻላል፡፡

የባሕር ዳር ዩኒቨርሲቲም ይህን ሀገራዊ አቅጣጫ በመከተል የራሱን ራዕይ ጥበብ 2017 ተብሎ የሚታወቀውን ስትራቴጂያዊ ዕቅድ በማውጣት የመጀመሪያውን የራዕይ ጥበብ 2017 የአምስት አመት ዘመን አጠናቋል፡፡ በዚህ ራዕይ መሠረት ዩኒቨርሲቲውን የምርምር ዩኒቨርሲቲ ለማድረግ በማለም መሠረታዊ ለውጦች ተደርግዋል፡፡ በአመለካከት፣ በክህሎት፣ በአደረጃጀት፣ በአሠራርና በግብአት ዩኒቨርሲቲውን የምርምር ዩኒቨርሲቲ ለማድረግ የሚያበቁ ሁኔታዎችን ለመፍጠር ባደረግነው ርብርብ አበረታች ውጤቶችን አስመዝግበናል፡፡ የምርምር ዩኒቨርሲቲ መገለጫ የሆኑ ግቦችን በመለየትና በልዩ ትኩረት እነዚህ ግቦች ላይ በመስራት ዩኒቨርሲቲውን ረጅም ርቀት መውሰድ ችለናል፡፡ የዩኒቨርሲቲያችን ራዕይ ጥበብ 2017 ዩኒቨርሲቲውን የምርምር ዩኒቨርሲቲ ማድረግ ላይ ስለሚያልም ለምርምርና ለድህረ ምረቃ ፕሮግራሞች መስፋፋት ልዩ ትኩረት ይሰጣል፡፡ በመሆኑም በሚቀጥሉት የሁኔታ ትንታኔዎች ስር በስፋት የተብራሩት ስራዎች በመሰራታቸው ከአምስት ሺህ በላይ የድህረ ምረቃ ፕሮግራሞች ተማሪዎችና ከ500 በላይ የምርምር ፕሮጀክቶች የሚሰሩበት ተቋም ማድረግ ተችሏል፡፡ ራዕዩን መተግበር ስንጀምር እዚህ ግባ የሚባል ምርምርና የድህረ ምረቃ ፕሮግራም ያልነበረ መሆኑን መግለጽ ተገቢ ነው፡፡

በዚህ ሰነድ የቀረበው የ”ራዕይ ጥበብ 2017” የሁለተኛው አምስት አመት ስትራቴጂያዊ ዕቅድ የተዘጋጀው በዚህ መግቢያ ላይ በአጭሩ የገለጽናቸውን ሀገራዊ አቅጣጫዎችንና ፍላጐቶችን መሠረት ባደረገ መልኩ ነው፡፡ በመሆኑም የዚህ የራዕይ ጥበብ 2017 የሁለተኛው አምስት አመት ስትራቴጂያዊ ዕቅድ የተመሰረተባቸው ሰነዶች የሚከተሉት ናቸው፡-

ሀ. የማስፈጸም አቅም ግንባታ ፖሊሲና ስትራቴጂ፣

ለ. የሁለተኛው የዕድገትና ትራንስፎርሜሽን ዕቅድ ረቂቅ፣

ሐ. አምስተኛው የትምህርት ዘርፍ ልማት ፕሮግራም፣

መ. የከፍተኛ ትምሀርት ዘርፍ የሁለተኛው የዕድገና ትራንስፎርሜሽ ዕቅድ፣

ሠ. የራዕይ ጥበብ 2017 የመጀመሪያው አምስት አመት ስትራቴጂክ ዕቅድ ግምገማ፣

ረ. የባሕር ዳር ዩኒቨርሲቲ የራዕይ ጥበብ 2017 ሰማያዊ መጽሐፍ፣

ሰነዱ በመጀመሪያ የዩኒቨርሲቲውን ተልዕኮ፣ ራዕይና እሴቶች አቅርቧል፡፡ ቀጥሎ ዩኒቨርሲቲው ባለፈው ስትራቴጂያዊ ዘመን ያከናወናቸውን ተግባራት ጠንካራና ደካማ ጎኖች እንዲሁም መልካም አጋጣሚዎችና ስጋቶች በሁኔታ ግምገማ ትንታኔ ስር ዳስሷል፡፡ ከዚያም ዩኒቨርሲቲው በአገሪቱ የሁለተኛው የዕድገትና ትራንስፎርሜሽን (2008-2012 ዓ.ም) ዘመን ለከፍተኛ ትምሀርት ከተሰጠው ድርሻ አንጻር ጥራትና አግባብነት ያለው ትምህርት በመስጠት በከፍተኛ ደረጃ የሰለጠነ የሰው ኃይል በማፍራት፣ ሀገራዊ ጠቀሜታ ያላቸው ጥናቶችና ምርምሮች በማካሄድ፣ የዕውቀትና የቴክኖሎጂ ሽግግር በማድረግ በኩል በተጠቀሰው ጊዜ ተደራሽ የሚሆኑ ስድስት ግቦችን አስቀምጧል፡፡ እነዚህን ግቦች ለማሳካት እንዲቻል አቅጣጫዎችንና የማስፈጸሚያ ስልቶችን እንዲሁም ፈጻሚ አካላትን ለይቶ አስቀምጧል፡፡ በመጨረሻም ሰነዱ ይህንን ስትራቴጂያዊ ዕቅድ በመጪዎቹ አምስት ዓመታት ተግባራዊ በማድረግ ዩኒቨርሲቲውን ወደታሰበው ደረጃ ለማራመድ በሚደረገው ጥረት ውስጥ ለዕቅዱ አፈፃፀም የሚደረገውን ክትትልና ግምገማ ስርዓት አካቷል፡፡

Note: The Amharic version of the strategic plan has attached below.